Буцах

Эрүүл мэндийн анхан шатны тусламж, үйлчилгээний хүртээмжийг нэмэгдүүлнэ

"Өрхийн эрүүл мэндийн төвөөс үзүүлж буй эрүүл мэндийн тусламж, үйлчилгээний өнөөгийн байдал, цаашид авч хэрэгжүүлэх арга хэмжээ" сэдэвт хэлэлцүүлэг өнөөдөр боллоо. Эрүүл мэндийн яам, Нийслэлийн Эрүүл мэндийн газар, НҮБ-ын Хүн амын сангаас хамтран зохин байгуулж буй уг хэлэлцүүлгийн гол зорилго нь Өрхийн эрүүл мэндийн төвийн эрх зүйн орчныг сайжруулах, түүний хэрэгжилтийг хангахад бүх шатны төрийн байгууллагуудын уялдаа холбоо, үүрэг оролцоог нэмэгдүүлэх, иргэдэд үзүүлж буй эрүүл мэндийн тусламж, үйлчилгээний чанар, хүртээмжийг сайжруулах, чадавхийг бэхжүүлэхэд оршиж байгаа юм.

2017 оны статистикаар Монгол Улсын хэмжээнд 4005 эрүүл мэндийн байгууллага үйл ажиллагаа явуулж байгаагаас 549 сум, тосгон, Өрхийн эрүүл мэндийн төв хүн амд эрүүл мэндийн анхан шатны тусламж, үйлчилгээ үзүүлж байна.
Өмчийн бүх хэлбэрийн эрүүл мэндийн байгууллага болон бусад салбарын эрүүл мэндийн ажилтнууд нийт 50519 байгаагийн 92,8 хувь нь эрүүл мэндийн салбар, 7,2 хувь нь бусад салбарын эрүүл мэндийн байгууллагын ажилтнууд байна. Нийт эрүүл мэндийн ажилтнуудын 22.3 хувь нь анхан шатны эрүүл мэндийн байгууллагад ажиллан эрүүл мэндийн тусламж, үйлчилгээ үзүүлж байна.

Монгол Улсын хэмжээнд 218 Өрхийн эрүүл мэндийн төв үйл ажиллагаа явуулж, нийт хүн амын 68.8 хувь буюу 2,2 сая хүн амд анхан шатны тусламж, үйлчилгээ үзүүлж байгаа юм.
Эрүүл мэндийн сайд Д.Сарангэрэл хэлэлцүүлгийн хүрээнд 2019 онд Дэлхийн эрүүл мэндийн өдрийг “Бүх нийтийн эрүүл мэндийн хамралт: эрүүл мэндийн анхан шатны тусламж, үйлчилгээг онцлох жил” болгосон. Энэ нь эрүүл мэндийн анхан шатны тусламж, үйлчилгээний хүртээмжийг нэмэгдүүлж, хүн бүрт хэрэгцээт эрүүл мэндийн чанартай тусламж, үйлчилгээг хаана байгаагаас нь үл хамааран санхүүгийн хүндрэл
бэрхшээлгүйгээр хүртэх боломжийг бий болгох явдал юм.

Эрүүл мэндийн анхан шатны тусламж, үйлчилгээний чанар, хүртээмжийг сайжруулах, шатлал хоорондын зохицуулалтыг боловсронгуй болгох замаар Дэлхийн эрүүл мэндийн байгууллагын зөвлөмж болгож байгаа “Хэнийг ч орхигдуулахгүй байх” зарчмыг баримтлан “Бүх нийтийн эрүүл мэндийн хамралт”-ыг хэрэгжүүлж, “Хүн төвтэй тусламж, үйлчилгээний цогц загвар”-ыг бий болгохоор зорин ажиллаж буйгаа хэллээ.

Эрүүл мэндийн анхан шатны тусламж, үйлчилгээнд мобайл технологи нэвтрүүлэн ажиллаж байгаа нь ч үр дүнгээ өгч байна.Тухайлбал ЭМЯ, ДЭМБ хамтран нийт 82 нэгжид мобайл технологи нэвтрүүлээд байна. Солонгосын олон улсын эрүүл мэндийн сан болон Солонгосын иргэдийн сангаас 2,2 тэрбум төгрөгийн санхүүжилт хийжээ. 
Энэ онд мобайл технологийг 11 аймгийн 16 сум, нийслэлийн 4 дүүргийн 4 хороонд хэрэгжүүлэхээр төлөвлөж байгаа юм. Ингэснээр 21 аймаг, нийслэлийн 9 дүүргийн 140 мянган иргэн төдийгүй малчны хот, захын дүүргийн задгайд оршин суугчид ч гэртээ шинжилгээ хийлгэн онош тогтоолгож эмчлүүлэх боломж бүрдэж байна.

НИЙСЛЭЛИЙН ЭРҮҮЛ МЭНДИЙН ГАЗАР

Монгол улсын хүн амын тоо